Ju mund te kerkoni materiale tjera ne Google!

Kosova PEN Center / PEN Qendra e Kosoves

SHPALLJA E FITUESIT TË ÇMIMIT VJETOR LETRAR TË PEN-it TË KOSOVËS PËR VITIN 2006

FITUESIT E CMIMIT VJETOR LETRAR TE PEN-t  TE KOSOVES PER 2006

Juria e Çmimit Vjetor Letrar 2006 të PEN-it të Kosovës në përbërje: Mehmet Kraja, Ali Podrimja dhe Ibrahim Berisha, pasi mori në shqyrtim produksionin vjetor të botimeve të autorëve të Kosovës nga fusha të ndryshme të krijimtarisë letrare gjatë vitit 2006, konstatoi se autorët tanë gjatë kësaj periudhe i dhanë lexuesit vepra të rëndësishme, vlera e të cilave i kalon kufijtë kohorë të një viti kalendarik. Është e rëndësishme të theksohet me këtë rast se vlerat letrare këtë vit paraqiten të balancuara dhe se përfshijnë gjini dhe zhanre të ndryshme letrare, që nga studimet për letërsinë e deri te proza e poezia.
 
Sikundër që tashmë është bërë publike, juria ka bërë përzgjedhjen e kandidaturave për këtë çmim, në cilën janë përfshirë veprat e këtyre autorëve:
 
1. Lindita Tahiri: “Monologu - personazhi dhe autori” (studim)
2. Basri Çapriqi: “Zbutja e gjarprit” (poezi)
3. Sali Bashota: “Proza e filleve të modernitetit” (studime)
4. Musa Ramadani: “Mëkatet e E(Ha)vës” (poezi)
5. Zehnullah Rrahmani: “99 rruaza prej smeraldi” (prozë)
6. Ramadan Musliu “Në zemër të gjërave” (poezi)
 
Pas kësaj përzgjedhjeje dhe pas një shqyrtimi të vëmendshëm të këtyre veprave, juria vendosi njëzëri që Çmimi Vjetor Letrar 2006 i PEN-it të Kosovës t’i jepet Lindita Tahirit për librin “Monlogu – personazhi dhe autori”.
 
Arsyetim:

Me studimin monografik “Monologu – personazhi dhe autori”, Lindita Tahiri ka bërë një depërtim interesant dhe të suksesshëm në interpretimin e letërsisë dhe të veprave të veçanta letrare, duke u përqendruar te fusha e stilistikës dhe duke u nisur nga kjo hapësirë e ndërmjetme mes gjuhësisë dhe letërsisë, ka arritur të përshkruajë jo vetëm veçoritë formale të tekstit letrar, por edhe të nxjerrë në pah domethënien funksionale të stilistikës në interpretimin e tekstit. Në këtë studim, analiza e autores ka marrë në shqyrtim treguesit gjuhësor të ligjërimit të rrëfyesit dhe të personazhit, për të zbuluar kështu raportin mes zërit rrëfyes dhe zërit të brendshëm fiktiv, kryesisht tek format romanore të shkrimit letrar, por jo vetëm tek ato. Duke përdorur këtë metodë interpretimi, përveç që letërsinë tonë e bën objekt të studimeve të profilizuara letrare, Lindita Tahiri avancon ndjeshëm teknikat e leximit të tekstit letrar, duke ofruar një model të ri të leximit dhe interpretimit, të mbështetur gjerësisht në studimet bashkëkohore në letërsinë e përbotëshme.
 
Prishtinë, më 28 dhjetor 2006
Mehmet Kraja
Ali Podrimja
Ibrahim Berisha