PER JU KEMI ZGJEDH INTERVISTEN E KRYETARIT TE PDK-se, HASHIM THACI, DHENE EMISIONIT TE BBC-se ZIG-ZAG NE GJUHEN SHQIPE

20.04.2007

Rezoluta e Këshillit të Sigurimit të OKB-së do të nxirret shumë shpejtë, pas rezolutës Kuvendi i Kosovës do ta nxjerr Kushtetutën e shtetit të pavarur dhe sovran të Kosovës, do të kemi edhe ceremonitë e zyrtarizimit të pavarësisë. Ne në mënyrë dinjitoze kemi zhvilluar luftën për liri, në mënyrë dinjitoze kemi kaluar këtë tranzicion demokratik, dhe në mënyrë dinjitoze, të përgatitur dhe unikë po e presim edhe ditën e zyrtarizimit të Kosovës së pavarur.

Qëllimi dhe përkushtimi im dhe i Partisë Demokratike të Kosovës, si forca kryesore politike në Kosovë është ruajtja dhe kultivimi i kohezionit politik shtetndërtues.
– tha kryetari i PDK-së z.Hashim Thaçi, në një intervistë dhënë emisionit të BBC-së “Zigzag”.

“Propozimi i Ahtisarit për Kosovën e pavarur, është zgjidhja e vetme e pranuar dhe e respektuar prej qytetarëve të Kosovë, prej Shteteve të Bashkuara të Amerikës, prej Bashkimit Evropian, prej sekretarit të përgjithshëm të OKB-së, nga Britania e Madhe, nga vendet fqinje, nga tërë bota demokratike. Tash do të ketë diskutime në kuadër të Këshillit të Sigurimit, por siç është i informuar opinioni, tashmë votat e mjaftueshme në KS të OKB-së për rezolutën për Kosovën veç janë siguruar. Kështu që, perspektiva për nxjerrjen e vendimit për rezolutën e re është në përfundim e sipër” – tha kryetari Thaçi në emisionin e Radios BBC të Londrës, “Zigzag”.

Kreu i opozitës kosovare ka folur edhe rreth vizitës së misionit faktmbledhës në Kosovë.

“Vizita e anëtarëve të Këshillit të Sigurimit që do t’i bëjnë Kosovës në ditët e ardhshme do të jetë një vizitë informuese, për t’u plotësuar ai informim, të cilin dëshirojnë ta kenë një pjesë e anëtarëve të KS të OKB-së.Përkushtimi i politikës kosovare, i qytetarëve të Kosovës është që anëtarët e Këshillit të Sigurimit të kthehen me një opinion edhe më pozitiv dhe kjo vizitë të ndikojë në unifikimin e qëndrimit për rezolutën e re për Kosovën”.

“Anëtarët e KS vijnë për të vizituar Kosovën, do ta vizitojnë edhe Beogradin, do të informohen prej autoriteteve të Beogradit për të ardhmen edhe të Serbisë, por edhe të rajonit, edhe të Kosovës. Sinjale shantazhi nga Beogradi kanë ndodhur edhe më herët, kanë ndodhur edhe në vitin 2003. Ne të gjithë duhet të fokusohemi si ti integrojmë serbët, qytetarë të Kosovës dhe natyrisht në kuadër të kësaj t’i marrim përgjegjësitë që na takojnë” – u shpreh kryetari i PDK-së.

“Ne po ndërtojmë Kosovë të pavarur, për të gjithë qytetarët e Kosovës, me të drejta të barabarta, duke respektuar veprimet afirmative për komunitetet, në veçanti për komunitetin serb, në mënyrë që të jenë pjesë aktive e Kosovës së re, e Kosovës së pavarur, të jenë pjesë e jetës demokratike, të kenë formacionet e tyre politike, të marrin pjesë në zgjedhje, të jenë pjesë e parlamentit dhe qeverisë së ardhshme të Kosovës” – theksoi z.Thaçi.

“Kosova po ndërtohet si shtet i pavarur, po ndërtohet si shtet i cili duhet të jetë funksional, efektiv, me institucione të plota, duke ushtruar autoritetin në tërë territorin e Kosovës, të ketë edhe autoritetin sovran në gjithë hapësirën e vet. Kështu që, jo rastësisht para tri viteve, për herë të parë, kam potencuar në Shtetet e Bashkuara të Amerikës që Kosova duhet të jetë shtet i pavarur dhe sovran, dhe jo vetëm i pavarur se mund të ketë shtete të pavarura, por t’u mungojë sovraniteti. Për këtë arsye Kosova do ta ketë edhe pavarësinë, edhe sovranitetin, një sovranitet që i hap perspektivë Kosovës, për t’u integruar në strukturat e Bashkimit Evropian dhe në NATO, në raporte të qëndrueshme dhe të drejtpërdrejta dhe bashkëpunimi me Shtetet e Bashkuara të Amerikës” – potencoi kryetari i PDK-së z.Hashim Thaçi.

Kryetari i partisë më të madhe në vend, në emisionin e BBC-së ka folur edhe për gjendjen në pjesën veriore të Mitrovicës.

“Unë kaherë kam dërguar mesazhin që qytetarët e pjesës veriore të Mitrovicës të mos i shesin pronat dhe shtëpitë e tyre, por të blejnë më tepër, të ketë projekte konkrete në këtë drejtim, projekte të cilat do t’i inkurajojnë njerëzit që të kthehen në trojet e veta për të vazhduar jetën e re në Kosovën e pavarur. Nuk do të vjen në shprehje asnjëherë ndarja e qytetit të Mitrovicës, veriu është pjesë e Kosovës, integriteti territorial i vendit respektohet dhe garantohet edhe prej parimeve të Grupit të Kontaktit, që nuk do të ketë ndarje të Kosovës, nuk do të ketë ndryshim të kufijve dhe nuk do të ketë bashkim me ndonjë vend tjetër”.

Kryetari i Partisë Demokratike të Kosovës është përgjigjur edhe në pyetjet që kishin të bëjnë më mundësinë e vënies së vetos nga ana e Rusisë dhe Kinës për rezolutën e re për Kosovën.

“Unë dua të besoj që nuk do të ndodh ndonjë pretendim për të vënë veto në rast të nxjerrjes së rezolutës së re për Kosovën, por mund të them se jemi duke shkuar të drejtim të një procesi të sigurt se rezoluta do të nxirret, do të kemi pajtueshmëri nga të dy vendet që u potencuan, por në çdo rrethanë do të kemi njohjen e Kosovës së pavarur, brenda shumë pak javëve”.

“Rezoluta e Këshillit të Sigurimit të OKB-së do të nxirret shumë shpejtë, pas rezolutës Kuvendi i Kosovës do ta nxjerr Kushtetutën e shtetit të pavarur dhe sovran të Kosovës, do të kemi edhe ceremonitë e zyrtarizimit të pavarësisë. Ne në mënyrë dinjitoze kemi zhvilluar luftën për liri, në mënyrë dinjitoze kemi kaluar këtë tranzicion demokratik, dhe në mënyrë dinjitoze, të përgatitur dhe unikë po e presim edhe ditën e zyrtarizimit të Kosovës së pavarur” – tha kryetari Thaçi.

Kreu i PDK-së është përgjigjur edhe në interesimet rreth e dëgjuesve rreth rolit të Maqedonisë dhe të vendeve të rajonit në raport me të ardhmen e Kosovës

“Angazhimi i Maqedonisë dhe të gjitha vendeve fqinjë, me përjashtim të Serbisë ka qenë korrekt, konstruktiv dhe mbështetës për zgjidhjen e statusit politik të Kosovës. Edhe Maqedonia, edhe Shqipëria, edhe Mali i Zi, por edhe vendet tjera në rajon nga ish-Jugosllavia, kanë dalë në përkrahje të propozimit të presidentit Ahtisari, që do të thotë që kemi një opinion të fuqishëm në favor të pavarësisë së Kosovës”.

Lideri i PDK-së ka riafirmuar qëndrimin e tij dhe të PDK-së për unitetin dhe përgjegjësinë qytetare dhe politike në momentin aktual.

“Kosova është unike, është e përgatitur, ka treguar përgjegjësi të lartë, edhe Kuvendi i Kosovës ka marrë përgjegjësitë që i takojnë, e ka përshëndetur propozimin e presidentit Ahtisari, prezencën civile ndërkombëtare dhe atë ushtarake të NATO-s, dhe ka deklaruar marrjen e përgjegjësive për implementimin e propozimit të presidentit Ahtisari”.

“Nuk pres mrekulli ditën e parë të pavarësisë, por pres sjellje të përgjegjshme, marrje të përgjegjësive të reja, në përputhshmëri me realitetet e krijuara dhe duhet të fokusohemi të gjithë që të kemi fillim të suksesshëm. I gjithë opinioni ndërkombëtar është i orientuar se çka po ndodh në Kosovë në ditët e para të pavarësisë. Këto ditë dhe ditët e ardhshme duhet t’i kalojmë në mënyrë të qetë, paqësore, në mënyrë që nga pavarësia e Kosovës të mos ndihet keq asnjë komunitet në Kosovë, sepse pavarësia e Kosovës duhet të jetë në interes të të gjithë qytetarëve të Kosovës. Unë besoj se do të jemi shumë dinjitozë, shumë të përgjegjshëm, si politikë dhe si qytetarë të Kosovës” – tha mes tjerash kryetari i PDK-së.

Në intervistën dhënë BBC-së, kryetari Thaçi ka folur edhe për simbolet e ardhshme të Kosovës.

“Simbolet e shtetit të Kosovës nuk janë çështje të një partie, të një individi, të një disponimi të një grupi të caktuar të njerëzve, por janë përkushtime dhe vlera identifikuese për vendin dhe për të gjithë qytetarët e Kosovës. Në këtë drejtim kam besim se edhe Kuvendi i Kosovës, politika kosovare dhe qytetarët e Kosovës do të jenë unikë në rastin e nxjerrjes së flamurit, stemës dhe himnit, në mënyrë që të kemi simbole unifikuese dhe identifikuese për qytetarët e Kosovës, që do t’i respektojmë dhe të ndihemi krenarë dhe dinjitozë me simbolet e ardhshme shtetërore të Kosovës”.

Duke u përgjigjur në interesimin e dëgjuesve të Radios BBC të Londrës, lidhur me mundësinë e rirreshtimeve politike në Kosovë, kryetari Thaçi theksoi:

“Sot për askënd nuk duhet të ketë ambicie për pushtet, duhet të ketë përkushtim për ndërtimin e shtetit, pastaj hapen perspektiva të reja të konkurrencës së vlerave demokratike. Opozita kosovare ka sakrifikuar shumë gjatë kësaj periudhe, duke ruajtur dhe kultivuar unitetin shtetformues në Kosovë. Ne kemi ofruar përkushtimin tonë të bashkëpunimit, të bashkëpërgjegjësive. Ka qenë një afrim i ndërsjellë, i cili është reflektuar në tërë skenën politike kosovare. Tërë përkushtimi im është ruajtja e unitetit politik, investimi për ndërtimin e institucioneve stabile dhe efektive, sepse para së gjithash kemi nevojë për institucione të cilat janë të gatshme t’i marrin përgjegjësitë dhe të mos kemi fillim të ndërtimit të shtetit të dështuar, por fillimin e ndërtimit të një shteti efektiv. Qëllimi dhe përkushtimi im dhe i Partisë Demokratike të Kosovës, si forca kryesore politike në Kosovë është ruajtja dhe kultivimi i kohezionit politik shtetndërtues”.

Ish-udhëheqësi politik i Ushtrisë Çlirimtare të Kosovës z.Hashim Thaçi, në emisionin e radio BBC-së në Londër, ka folur edhe rreth gjykimit të ish-komandantit të Zonës Operative të Dukagjinit të UÇK-së Ramush Haradinaj në Hagë.

“Ushtria Çlirimtare e Kosovës, shqiptarët e Kosovës nuk kanë kryer krime, kanë zhvilluar luftë çlirimtare dhe çdo shqiptar në Hagë, gjendet padrejtësisht dhe natyrisht që përkushtimi i të gjithë neve është që të lirohen sa më shpejtë që është e mundur. Atje do të dëshmohet pafajësia e njerëzve që gjendet atje, sepse UÇK ka zhvilluar luftë të drejtë, luftë çlirimtare, ka ruajtur dhe kultivuar partneritetin me NATO-n dhe botën perëndimore, ka luftuar kundër gjenocidit të Serbisë”.